Ind disable

2012, ഒക്‌ടോബർ 10, ബുധനാഴ്‌ച

ജീവചരിത്രം !!!



ഒരു  വ്യാഴവട്ടക്കാലം
ഉന്മാദമായിരുന്നുവെന്നോ
ഉദാത്തമായിരുന്നുവെന്നോ 
തിരിച്ചറിയാതെ,
വാക്കുകളില്ലാത്ത വാചാലതകൊണ്ട് 
കാലത്തിന്റെ കാന്‍വാസില്‍ കോറിയിട്ടത്.

ഒരു ചെറിയ ചാറ്റല്‍ മഴയില്‍പ്പോലും
നനഞ്ഞു കുതിര്‍ന്നു
തീര്‍ന്നു പോയേക്കാവുന്ന
എന്റെ ഉല്പത്തി അടയാളപ്പെടുത്തിയ
ജീവന്റെ പുസ്തകം .
ആ പുസ്തകത്തിലെ 
എന്നെക്കുറിച്ച്
ഒന്നരപുറത്തില്‍
കവിയാത്ത താളില്‍
ബാലിശമായ ചാപല്യത്തിന്റെയും
ആത്മ സംഘര്‍ഷത്തിന്റെയും 
ബോധാബോധത്തിന്റെയും
ആരോഹണാവരോഹണങ്ങള്‍
    ക്രമതെറ്റിയ ഒരു ഉപന്യാസം 
വിഫല ശ്രമത്താല്‍ വിവര്‍ത്തനം
ചെയ്യപ്പെട്ടത്.

എന്നിരുന്നാലും
ഒറ്റ നിശ്വാസത്തിന്റെ
ഗതിവേഗതയില്‍
വായിച്ചെടുക്കാവുന്നത്രമാത്രം
ശൂന്യവും ക്ഷണികവുമായിരുന്നുവോ 
ഈ ഞാനും എന്റെ ഈ ജീവചരിത്രവും ..?